::: رسول اللہ صلی اللہ علیہ وعلی آلہ وسلم کے لیے موت کا لفظ استعمال کرنا :::

::::::: رسول اللہ صلی اللہ علیہ وعلی آلہ وسلم کے لیے موت کا لفظ استعمال کرنا :::::::

بسم اللہ ، والصلاۃ و السلام علی خیر خلقہ و عبدہ و رسولہ محمد ، و علی اصحابہ و ازواجہ و آلہ اجمعین

السلام علیکم ورحمۃ اللہ و برکاتہ

اِس حقیقت میں شک کی کوئی ادنیٰ سی گنجائش بھی نہیں کہ محمد رسول اللہ صلی اللہ علیہ وعلی آلہ وسلم اللہ تبارک وتعالیٰ کی مخلوق میں سب سے زیادہ بلند ،اعلی اور ارفع رُتبے والے ہیں ،

اور اُن صلی اللہ علیہ وعلی آلہ وسلم سے محبت اِیمان کا لازم جز ہے ، اس کا بیان  """سیرت والے مضامین """ میں سے آٹھویں مضمون""" رسول اللہ صلی اللہ علیہ و علی آلِہ وسلم سے مُحبت اور اُن کی تابع فرمانی"""میں ،

 اور """رسول اللہ صلی اللہ علیہ وعلی آلہ وسلم کی مدد کیجیے"""میں سے """تکمیل اِیمان کی شرط :::رسول اللہ صلی اللہ علیہ و علی آلہ وسلم سے محبت""" میں کیا جا چکا ہے،

الحمد للہ ، سیرت سے متعلق تمام مضامین درج ذیل ربط پر میسر ہیں :

http://bit.ly/1xakVl7

جس طرح محمد رسول اللہ صلی اللہ علیہ وعلی آلہ وسلم سے محبت کرنا ، اِیمان کا ایک لازمی جُزء ہے ،  اِسی طرح اُس محبت میں اُسی محبوب صلی اللہ علیہ وعلی آلہ وسلم کی ، اور اُن کے اور ہم سب کے اکیلے خالق اور مالک کی مقرر کردہ حُدُود سے تجاوز کرنا اِیمان کے منافی ہے ، گناہ ہے ،

جسے رسول اللہ صلی اللہ علیہ وعلی آلہ وسلم سے جس قدر زیادہ محبت ہو گی اُس کے لیے رسول اللہ صلی اللہ علیہ وعلی آلہ وسلم کی موت کا ذِکر اُسی قدر غم ناک ہو گا،

لیکن محبت  کا یہ مطلب ہر گز نہیں کہ حقائق سے نظر چرائی جائے اور محبوب صلی اللہ علیہ وعلی آلہ وسلم کی تعلیمات سے رُو گردانی کی جائے اور محبوب کی تابع فرمانی کرنے کی بجائے اپنی محبت کے زعم میں اُس کی نافرمانی کی جائے ،

اللہ جلّ شانہ ُ کے علاوہ جو کچھ بھی تھا ، اور ہے اور ہوگا وہ اللہ کی مخلوق ہے ، اُسی مخلوق میں سے اللہ کے تمام تر نبی اور رسول علیہم الصلاۃ و السلام  بھی تھے ، جب میں سے سب سے آخری اور سب سے افضل اعلی اور عظیم محمد رسول اللہ صلی اللہ علیہ وعلی آلہ وسلم تھے ،

یہاں سے آگے چلنے سے پہلے اپنے آپ کو مضبوط کر لیجیے ، اور یہ جان رکھیے کہ  موت ایک ایسی حقیقت ہے جس سے کسی مخلوق کو مفر نہیں ،

عیسیٰ علیہ السلام کے علاوہ ہر ایک نبی اور رسول علیہم السلام پر موت وارد ہوئی ، کسی کو اس سے مفر نہیں ، اور عیسیٰ علیہ السلام پر بھی موت وارد ہونا ہے ، کسی کو اس سے چھوٹ نہیں ،

رسول اللہ محمد صلی اللہ علیہ وعلی آلہ وسلم کے بارے میں یہ کہنا کہ اُن پر موت وارد ہوئی ،یقیناً بڑا دُکھ ناک ہوتا ہے ، لیکن یہ ایک ایسی حقیقت ہے جس سے انکار ممکن نہیں ،

 ہمارے اپنے خود ساختہ معیاروں کے مطابق رسول اللہ صلی اللہ علیہ و علی آلہ وسلم کے لیے موت کا لفظ اِستعمال کرنا گوارا نہیں کرتے ، تو یہ ہماری ذاتی سوچ پر منحصر ہے ،

اللہ جلّ جلالہُ نے اپنے نبی کریم صلی اللہ علیہ وعلی آلہ وسلم سے اِرشاد فرمایا  کہ ﴿ إِنَّكَ مَيِّتٌ وَإِنَّهُم مَّيِّتُونَ::: بےشک آپ کو بھی موت آنی ہے ، اور اِن سب کو بھی موت آنی ہے﴾سُورت  الزُمر(39)/آیت 30،

آپ ترجمے کے الفاظ کچھ اور بھی کر لیجیے تو بھی اِس حقیقت سے انکار کی گنجائش نہیں کہ اللہ تبارک وتعالیٰ نے اپنے خلیل محمد رسول اللہ صلی اللہ علیہ وعلی آلہ وسلم پر موت کے وارد ہونے کا اعلان فرمایا،

رسول اللہ صلی اللہ علیہ وعلی آلہ وسلم پر موت وارد ہونے کا ذکر کرنے کو گستاخی ، یا ، بے ادبی، یا نا مُناسب  سمجھنے والوں کے لیے  اللہ تبارک و تعالیٰ کے اِس مذ کورہ بالا فرمان کے بعد ، اب  میں اُن لوگوں کی باتیں پیش کرتا ہوں جن سے بڑھ کر رسول اللہ سلی اللہ علیہ و علی آلہ وسلم سے  قولی ،اور عملی ظاہری اور باطنی محبت کرنے والا کوئی بھی اور نہ تھا اور نہ ہو سکتا ہے ،

:::::: (1) ::::::: رسول اللہ صلی اللہ علیہ وعلی آلہ وسلم کے پہلے بلا فصل خلیفہ ابو بکر رضی اللہ عنہ ُ نے رسول اللہ صلی اللہ علیہ وعلی آلہ وسلم کی وفات  کے موقع پر کیا فرمایا ؟؟؟ جب رسول اللہ صلی اللہ علیہ وعلی آلہ وسلم کی وفات کے بعد أمیر المؤمنین ابو بکر الصدیق رضی اللہ عنہ ُ رسول اللہ صلی اللہ علیہ وعلی آلہ وسلم کے حجرہ میں داخل ہوئے اور رسول اللہ صلی اللہ علیہ وعلی آلہ وسلم کے چہرہ مُبارک سے کپڑا ہٹایا تو فرمایا (((بِأَبِى أَنْتَ وَأُمِّى طِبْتَ حَيًّا وَمَيِّتًا ، وَالَّذِى نَفْسِى بِيَدِهِ لاَ يُذِيقُكَ اللَّهُ الْمَوْتَتَيْنِ أَبَدًا  :::میرے پاں باپ آپ پر قربان ہوں ، آپ زندہ حالت میں بھی پاکیزہ تھے اور میت ہو کر بھی پاکیزہ ہیں ، اُس کی قسم جس کے ہاتھ میں میری جان ہے ، اللہ ہر گز بھی  آپ کو دو دفعہ موت نہیں دے گا)))صحیح البخاری /کتاب فضائل الصحابہ/باب5م،

 اور اِسی باب میں، اگلی حدیث میں ،  اس کے کچھ دیر کے بعد کا واقعہ بھی مذکور ہے کہ ، أمیر المؤمنین ابو بکر الصدیق رضی اللہ عنہ ُ نے لوگوں سے خطاب فرمایا اور کہا (((أَلاَ مَنْ كَانَ يَعْبُدُ مُحَمَّدًا - صلى الله عليه وسلم - فَإِنَّ مُحَمَّدًا قَدْ مَاتَ ، وَمَنْ كَانَ يَعْبُدُ اللَّهَ فَإِنَّ اللَّهَ حَىٌّ لاَ يَمُوتُ . وَقَالَ ﴿ إِنَّكَ مَيِّتٌ وَإِنَّهُمْ مَيِّتُونَ ﴾ وَقَالَ ﴿ وَمَا مُحَمَّدٌ إِلاَّ رَسُولٌ قَدْ خَلَتْ مِنْ قَبْلِهِ الرُّسُلُ أَفَإِنْ مَاتَ أَوْ قُتِلَ انْقَلَبْتُمْ عَلَى أَعْقَابِكُمْ وَمَنْ يَنْقَلِبْ عَلَى عَقِبَيْهِ فَلَنْ يَضُرَّ اللَّهَ شَيْئًا وَسَيَجْزِى اللَّهُ الشَّاكِرِينَ﴾:::خبردار ، (یعنی سب اچھی طرح سے سمجھ لو)جو کوئی تو محمد کی عِبادت کرتا تھا تو وہ(جان لے)کہ یہ بات یقینی ہے کہ  محمد(صلی اللہ علیہ وعلی آلہ وسلم ) پر موت وارد ہو گئی ہے ، اور جو کوئی اللہ کی عِبادت کرتا تھا تو (وہ یہ جان رکھے)کہ اللہ زندہ ہے کبھی نہیں مرے گا ، اور پھریہ آیت پڑھی کہ﴿بےشک آپ کو بھی موت آنی ہے ، اور اِن سب کو بھی موت آنا ہے﴾اور یہ آیت پڑھی کہ﴿اور محمد تو صِرف رسول ہیں ، اُن سے پہلے بھی رسول ہو گذرے ہیں ، کیا اگر محمد مر جائیں یا قتل کر دیے جائیں تو تم لوگ اپنی ایڑیوں کے بل واپس پلٹ جاؤ گے ، (اور اگر ایسا کرو گے تو )اللہ کو کوئی چیزنقصان نہیں پہنچا سکتی ، اور اللہ جلد ہی شکر کرنے والوں کو جزاء دے گا﴾)))،

:::::: (2) ::::::: رسول اللہ صلی اللہ علیہ وعلی آلہ وسلم کی محبوب ترین زوجہ محترمہ ، اِیمان والوں کی امی جان عائشہ رضی اللہ عنہا و أرضاھا کا کہنا ہے کہ (((لَقَدْ مَاتَ رَسُولُ اللَّهِ -صلى الله عليه وسلم- وَمَا شَبِعَ مِنْ خُبْزٍ وَزَيْتٍ فِى يَوْمٍ وَاحِدٍ مَرَّتَيْنِ ::: رسول اللہ صلی اللہ علیہ وعلی آلہ وسلم پر موت وارد ہو گئی ،اور(اُن کی ساری زندگی اِس حال میں گذر گئی کہ)کبھی ایک ہی دِن میں دو دفعہ روٹی اور تیل نہیں کھایا)))صحیح مُسلم/کتاب الزُھد والرقاق/پہلا باب،

امی جان عائشہ رضی اللہ عنہا و أرضاھا کے اِس مذکورہ بالا بیان میں رسول اللہ صلی اللہ علیہ وعلی آلہ وسلم سے محبت کے دعوے کرنے والے اُن لوگوں کے لیے بہت بڑا پیغام ہے جو خود تو پیٹ بھر کر کھاتے ہیں اور جانتے ہیں کہ ٹھیک اِسی وقت اُن کے کتنے ہی مُسلمان بھائی اور بہنیں بھوکے پیاسے ہیں ، زندگی کی ضروریات پوری کرنے کے لیے تڑپ رہے ہیں ، اور یہ اُن تک رسائی بھی رکھتے ہیں لیکن اپنی لذتیں ترک کرنا تو درکنار اُن میں کچھ کمی بھی نہیں کرتے اور دعویٰ ہوتا ہے محبت بلکہ بقول اُن کے رسول صلی اللہ علیہ وعلی آلہ وسلم کا ،

بیوی بچوں کی خواہشات پوری کرنے کے لیے اچھے اچھے ہوٹلوں میں کھاتے ہیں اور وہاں جاتے ہوئے اور وہاں سے آتے ہوئے کئی حقیقی طور پر محتاج دکھائی دیتے ہیں تو انہیں دھتکار دیتے ہیں ، اور دعویٰ کرتے ہیں محبت بلکہ بقول اُن کے عشقء رسول صلی اللہ علیہ وعلی آلہ وسلم کا ،

جب کہ محبت اور عشق میں بہت فرق ہے اور یہ جذبہ اللہ اور اس کے رسول کریم محمد صلی اللہ علیہ وعلی آلہ وسلم سے منسوب کرنا قطعاً مناسب نہیں ، """ رسول اللہ صلی اللہ علیہ و علی آلہ وسلم پر صلاۃ معنی مفہوم، صحیح اور ضعیف فضائل اور اعمال """ میں لکھا تھا کہ :::

 [لفظ عِشق کا اِستعمال رسول اللہ صلی اللہ علیہ وعلی آلہ وسلم کی ذات مُبارک ، اور اللہ تبارک وتعالیٰ کی ذات پاک کے لیے اِستعمال کرنا دُرُست نہیں، کیونکہ محبت اور عِشق ایک جذبے کے دو الگ الگ انداز ہیں ، ایک انداز پاکیزگی پر مشتمل ہے اور دُوسراانداز جسے عِشق کہا جاتا ہے ، وہ ہے جب محبت میں نفسانی خواہشات کی تکمیل کا لالچ یا مقصد بھی شامل ہو جائے ، لہذا یہ لفظ ، یہ جذبہ اللہ جلّ شانہ ُ کی ذات پاک کے لیے ، اور اُس کے خلیل محمد رسول اللہ صلی اللہ علیہ وعلی آلہ وسلم کی ذات پاک کے لیے اِستعمال کرنا قطعاً مُناسب نہیں ، جِسے اپنی محبت کا دعویٰ کرنا ہے تو محبت کا نام دے کر کرے ، عِشق کا نہیں]

اللہ ہی ہے جو ہمیں ہماری غلطیاں ماننے کی جرأت دے سکتا ہے اور اُن کی اصلاح کی ہمت بھی ،

:::::: (3) ::::::: رسول اللہ صلی اللہ علیہ وعلی آلہ وسلم کے چچا جان ، فضل رضی اللہ عنہ ُ بن عبدالمطلب  کا کہنا ہے کہ (((إِنَّ رَسُولَ اللَّهِ ،-- قَدْ مَاتَ وَإِنَّهُ لَبَشَرٌ ، وَإِنَّهُ يَأْسُنُ كَمَا يَأْسُنُ الْبَشَرُ أَىْ قَوْمِ ، فَادْفِنُوا صَاحِبَكُمْ فَإِنَّهُ أَكْرَمُ عَلَى اللَّهِ مِنْ أَنْ يُمِيتَهُ إِمَاتَتَيْنِ:::بے شک رسول اللہ (صلی اللہ علیہ وعلی آلہ وسلم ) پر موت وارد ہو گئی ہے (وہ مر گئے ہیں)، اور وہ بھی بشر( اِنسان) تھے ، اور کسی بھی دوسرے بشر کی طرح  اُن میں بھی تبدیلی ہوتی تھی ، اے لوگو ، اٹھو اور اپنے ساتھی کو دفن کرو، بے شک وہ اللہ کے ہاں اتنے عزت والے ہیں کہ اللہ اُنہیں دو دفعہ موت نہیں دے گا)))سُنن الدارمی /حدیث83،

:::::: (4) ::::::: رسول اللہ صلی اللہ علیہ وعلی آلہ وسلم کے چچا زاد بھائی ، اور صحابہ رضی اللہ عنہم اجمعین میں سے فقیہ اور مفسر ء قران صحابی عبداللہ ابن عباس رضی اللہ عنہما  کا کہنا ہے ہے (((لَمَّا مَاتَ رَسُولُ اللَّهِ صَلَّى اللهُ عَلَيْهِ وَسَلَّمَ قُلْتُ لِرَجُلٍ مِنَ الْأَنْصَارِ هَلُمَّ يَا فُلَانُ، فَلْنَطْلُبِ الْعِلْمَ، فَإِنَّ أَصْحَابَ رَسُولِ اللَّهِ صَلَّى اللهُ عَلَيْهِ وَسَلَّمَ أَحْيَاءٌ۔۔۔۔۔۔::: جب رسول اللہ صلی اللہ علیہ وعلی آلہ وسلم پر موت وارد ہو گئی ،تو میں نے انصار میں سے ایک شخص سے کہا ،آؤ اے فُلان ، آؤ عِلم طلب کریں ، کہ رسول اللہ صلی اللہ علیہ وعلی آلہ وسلم کے صحابہ تو زندہ ہیں۔۔۔۔۔۔)))مُستدرک الحاکم/حدیث /6294کتاب معرفۃ الصحابۃ/بابذِكْرُ عَبْدِ اللَّهِ بْنِ عَبَّاسِ بْنِ عَبْدِ الْمُطَّلِبِ رَضِيَ اللَّهُ عَنْهُمَا، إِمام شمس الدین الذھبی نے کہا یہ روایت بخاری کی شرائط کے مطابق (صحیح )ہے،

:::::: (5) ::::::: رسول اللہ صلی اللہ علیہ وعلی آلہ وسلم کی ایک اور زوجہ محترمہ اِیمان والوں کی امی جان ام سلمہ رضی اللہ عنہا و أرضاھا کا کہنا ہے کہ (((مَا مَاتَ رَسُولُ اللَّهِ -صلى الله عليه وسلم- حَتَّى كَانَ أَكْثَرُ صَلاَتِهِ قَاعِدًا إِلاَّ الْفَرِيضَةَ وَكَانَ أَحَبُّ الْعَمَلِ إِلَيْهِ أَدْوَمَهُ وَإِنْ قَلَّ::: رسول اللہ صلی اللہ علیہ وعلی آلہ وسلم کا مرنے تک یہ معاملہ ہو چکا تھا کہ وہ سوائے فرض کے زیادہ تر نمازیں بیٹھ کر پڑھتے تھے ، اور اُن ہمیشگی کے ساتھ کیا جانا والا عمل زیادہ پسند تھا خواہ وہ تھوڑا ہی ہوتا)))سُنن  النسائی /حدیث/1654کتاب قيام الليل وتطوع النهار،/باب19صلاة القاعد في النافلة وذكر الاختلاف على أبي إسحاق في ذلك، إِمام الالبانی رحمہ ُ اللہ نے صحیح قرار دِیا ،

اور بھی کئی روایات پیش کی جا سکتی ہیں ، لیکن اُمید ہے کہ اِن شاء اللہ بات کو سمجھنے کے لیے اتنی ہی کافی ہوں گی ،

کہ حقیقت کو قبول کرنا ہی درستگی پر پہنچنے کا سبب بنتا ہے ، اپنی ذاتی آراء اور بلا دلیل افکار کو بنا پر حقائق کو انکار حق سے دُور لے جاتا ہے ،

چلتے چلتے یہ بھی سوال بھی ذہن میں لیتے جایے کہ صحابہ رضی اللہ عنہم اجمعین میں سے کسی نے دوسرے سے یہ نہیں کہا کہ موت مت کہیے ، وصال کہیے ،  یا اسی قسم کے ایسے الفاظ استعمال کر لیجیے جو موت کا مفہوم دینے والے تو ہوں لیکن موت مت کہیے ،

اور ذرا یہ بھی سوچیے گا کہ لفظ """وصال""" کی حقیقت کیا ہے ؟؟؟

لُغوی طور پر بھی  اور عقیدے کے پس منظر میں بھی  ؟؟؟

اور جو کچھ سمجھ آئے مجھے بھی بتایے گا ،

پیشگی شکریہ ، اور جزاک اللہ خیراً،

والسلام علیکم۔

تاریخ کتابت :27/10/1436ہجری،بمُطابق،12/08/2015عیسوئی۔

۔۔۔۔۔۔۔۔۔۔۔۔۔۔۔۔

مضمون کا برقی نسخہ درج ذیل ربط پر مُیسر ہے :

http://bit.ly/2lTBxys

۔۔۔۔۔۔۔۔۔۔۔۔۔۔۔۔

::::: عورت اور مرد کی نماز کی ادائیگی کی کیفیت میں فرق :::::

:::::  عورت اور مرد کی نماز کی  ادائیگی  کی کیفیت میں فرق :::::

أَعُوذُ بِاللَّهِ السَّمِيعِ الْعَلِيمِ مِنَ الشَّيْطَانِ الرَّجِيمِ مِنْ هَمْزِهِ وَنَفْخِهِ وَنَفْثِهِ

بِسمِ اللَّہ ،و السَّلامُ عَلیَ مَن اتَّبَع َالھُدیٰ و سَلکَ عَلیَ مَسلکِ النَّبیِّ الھُدیٰ مُحمدٍ صَلی اللہُ علیہِ وعَلیَ آلہِ وسلَّمَ ، و قَد خَابَ مَن یُشاقِقِ الرَّسُولَ بَعدَ أَن تَبیَّنَ لہُ الھُدیٰ ، و اتَّبَعَ ھَواہُ فقدوَقعَ فی ضَلالٍ بعیدٍ۔

میں  شیطان مردُود(یعنی اللہ کی رحمت سے دُھتکارے ہوئے)کے ڈالے ہوئے جُنون،اور اُس کے دِیے ہوئے تکبر، اور اُس کے (خیالات و افکار پر مبنی)اَشعار سے، سب کچھ سننے والے ، اور سب کچھ کا عِلم رکھنے والے اللہ کی پناہ طلب کرتا ہوں،

شروع اللہ کے نام سے ، اورسلامتی ہو اُس شخص  پر جس نے ہدایت کی پیروی کی ، اور ہدایت لانے والے نبی محمد صلی اللہ علیہ وعلی آلہ وسلم کی راہ پر چلا ، اور یقینا وہ شخص تباہ ہوا جس نے رسول کو الگ کیا ، بعد اِس کے کہ اُس کے لیے ہدایت واضح کر دی گئی اور(لیکن اُس شخص نے)اپنے نفس  کی خواہشات کی پیروی کی پس بہت دُور کی گمراہی میں جا پڑا ۔

السلامُ علیکُم و رحمۃُ اللہ و برکاتہُ ،

 تمام نبیوں اور رسولوں کے سردار ، اللہ کی مخلوق میں سے اللہ کو سب سے زیادہ جاننے والے ، اللہ کی سب سے بہترین اور مکمل ترین عِبادت کرنے والے ، اللہ کے بندے اور رسول مُحمد صلی اللہ علیہ وسلم نے اللہ کی نگرانی اور اللہ کی عطاء کردہ عصمت میں اپنے منصبِ رسالت کو بہترین اور مکمل ترین طور پر نبھاتے ہوئے اللہ کے ہر ہر حُکم کی عملی اور ز ُبانی وضاحت فرما دی،

شاید ہی کوئی مُسلمان ایسا ہو گا جو ز ُبانِ قال سے اِس بات سے اِنکار کرتا ہو لیکن افسوس کہ زُبانِ حال سے اِنکار کرنے والے نظر آتے ہیں ، اور ایسی باتیں کہی اور لکھی جاتی ہیں جو رسول اللہ صلی اللہ علیہ وسلم کے قول و فعل سے ثابت نہیں بلکہ بسا اوقات اُن صلی اللہ علیہ وسلم کے قول و فعل کی مُخالفت بھی نظر آتی ہے ، اللہ تعالیٰ ہر مُسلمان کو اپنی اور اپنے رسول صلی اللہ علیہ وسلم کی مکمل اتباع کی توفیق عطا فرمائے ،

اللہ سبحانہُ و تعالیٰ کے حُکموں میں سے ایک نماز قائم کرنے کا حُکم بھی ہے اور رسول اللہ صلی اللہ علیہ وسلم نے دِین کے اِس رُکن اور سب سے اہم ترین عِبادت کو زُبانی اور عملی طور پر بڑی وضاحت سے سمجھا دِیا اور اُن صلی اللہ علیہ وسلم کے صحابہ رضی اللہ عنہم اجمعین نے بڑی ہی باریک بینی اور امانت کے ساتھ آگے پہنچا دِیا ، اللہ اور رسول اللہ صلی اللہ علیہ وسلم کی طرف سے عورت اور مرد کے لیے نماز کی کیفیت اور ادائیگی کے طریقے میں کہیں کوئی فرق نہیں رکھا گیا ،

ہمارے کچھ  بھائی عورت اور مرد کی نماز کی کیفیت میں فرق بیان کرتے ہیں، کہیں اُسے  زمین کے ساتھ چپک کر نماز پڑھنے کا کہا جاتا ہے ، کہیں  کسی خاص انداز میں بیٹھنے کا کہا جاتا ہے ،

سالہا سال سے میں اُن کی کتابوں میں کوئی ایسی صحیح ثابت شُدہ  دلیل تلاش کر رہا ہوں  جو اُن کے اِس دعوے یا فتوے کی تائید کرتی ہو ، لیکن بے سُود ،

 اُن سے اور اُن کے کئی عُلماء سے جو  ماشاء اللہ مُفتی کے منصب دار ہیں ، بالمشافہ پوچھ چُکا ہوں لیکن جواب ندارد،

 پھر بھی جو بات اُن کو ملی ہے اُسی پر عمل کیے جا رہے ہیں اور اُس کی تشہیر بھی کیے جارہے ہیں ، جبکہ اِس فرق کی کوئی صحیح ثابت شدہ دلیل  اُن کے پاس کوئی دلیل نہیں ،

سوائے اِس فلسفے کے کہ """چونکہ رسول اللہ صلی اللہ علیہ وسلم نے عورت کو ڈھک چُھپ کر نماز پڑھنے کا حُکم دِیا ہے اِس لیے ہم اُسے زمین کے ساتھ چپک کر اور بازوپسلیوں کے ساتھ لگا کرسجدہ کرنے کا طریقہ سِکھاتے ہیں"""،

اِس فلسفے کے لیے کوئی ثابت شدہ دلیل مُیسر نہیں ،

جی، دو ضعیف روایات ہیں ، جِن کو شاید عورت اور مرد کی نماز کی کیفیت میں فرق کی بنیاد بنایا جاتا ہو، یہ دونوں روایات  إمام البیہقی رحمہُ اللہ نے اپنی "سُنن الکبریٰ " میں روایت کی ہیں ،

اور اِن کو روایات کرنے سے پہلے لکھا ہے کہ """وَقَدْ رُوِىَ فِيهِ حَدِيثَانِ ضَعِيفَانِ لاَ يُحْتَجُّ بِأَمْثَالِهِمَا::: اور اِس (مسئلے میں ، یعنی عورت کی نماز کا طریقہ یا کیفیت الگ ہونے کے مسئلے ) میں  دو ضعیف (یعنی کمزور) حدیثیں روایت کی گئی ہیں ، ایسی حدیثوں کو حُجت نہیں بنایا جا سکتا   """،

::: () ::: ابو سعید الخُدری رضی اللہ سے  ایک طویل حدیث میں  کے درمیان میں روایت کیا گیا ہے کہ  (((وَكَانَ يَأْمُرُ الرِّجَالَ أَنْ يَتَجَافُوا فِى سُجُودِهِمْ ، وَيَأْمُرُ النِّسَاءَ يَنْخَفِضْنَ فِى سُجُودِهِنَّ ، وَكَانَ يَأْمُرُ الرِّجَالَ أَنْ يَفْرِشُوا الْيُسْرَى وَيَنْصِبُوا الْيُمْنَى فِى التَّشَهُّدِ ، وَيَأْمُرُ النِّسَاءَ أَنْ يَتَرَبَّعْنَ  ::: اور رسول اللہ صلی اللہ علیہ وعلی آلہ وسلم مَردوں کو حکم دِیا کیا کرتے تھے کہ اپنے سجدوں میں اپنی بازؤں کو کھلا رکھیں ، اور عورتوں کو حکم دِیا کرتے تھے کہ  اپنے سجدوں میں جُھک جایا کریں (زمین سے چپک جایا کریں )اور مَردوں کو حکم دِیا کرتے تھے کہ تشھد میں اپنے الٹے پاؤں کو بچھایا کریں اور سیدھے پاؤں کو کھڑا رکھیں کریں ، اور عورتوں کو حکم دِیا کرتے تھے کہ (تشھد میں ) اپنے دونوں پاؤں جسم کے نیچے  بچھا کر بیٹھا کریں  )))سُنن الکبریٰ للبیہقی /حدیث /3014کتاب الحیض /باب 335ما يستحب للمرأة من ترك التجافي في الركوع والسجود ،

 اور خود إمام البیہقی رحمہُ اللہ نے یہ روایت نقل کرنے کے بعد فرمایا ہے کہ """ واللفظ الأول واللفظ الآخر من هذا الحديث مشهوران عن النبي صلى الله عليه و سلم وما بينهما منكر والله أعلم:::اِس حدیث کا پہلا حصہ اور آخری حصہ دونوں ہی نبی صلی اللہ علیہ وسلم سے  مشہور  (انداز میں  مروی )ہیں ،اور جو اِن دونوں کے درمیان ہے (یعنی یہ مذکورہ بالا اِلفاظ ) یہ منکر ہے  """،

لہذا ا یہ  روایت قابل حُجت نہیں ، اِس سے کوئی حکم نہیں لیا  جا سکتا ،

اِس کے بعد إمام البیہقی رحمہُ اللہ نے درج ذیل روایت ذِکر کی ،

::: () ::: عبداللہ ابن عُمر سے روایت کیا گیا کہ  (((إِذَا جَلَسْتِ الْمَرْأَةُ فِى الصَّلاَةِ وَضَعَتْ فَخِذَهَا عَلَى فَخِذِهَا الأُخْرَى ، وَإِذَا سَجَدْتْ أَلْصَقَتْ بَطْنَهَا فِى فَخِذَيْهَا كَأَسْتَرِ مَا يَكُونُ لَهَا ، وَإِنَّ اللَّهَ تَعَالَى يَنْظُرُ إِلَيْهَا وَيَقُولُ : يَا مَلاَئِكَتِى أُشْهِدُكُمْ أَنِّى قَدْ غَفَرْتُ لَهَا::: جب عورت نماز میں  بیٹھے  تو اپنی ایک ران کو دُوسری ران پر رکھے ، اور جب سجدہ کرے تو اپنے پیٹ کو اپنی دونوں رانوں کے ساتھ چپکا لے ،  کہ یہ اُس کے لیے سب سے زیادہ پردے والا ہو گا ، اور اللہ تعالیٰ اُس کی طرف دیکھتا ہے تو فرماتا ہے کہ ، اے میرے فرشتو ، گواہ رہنا کہ میں اِس عورت کی بخشش کر دی ہے ))) سابقہ حوالہ ،

 پہلی روایت کی سند میں عطاء بن العجلان نامی راوی ، اور دُوسری روایت میں ابو مطیع نامی راوی کی و جہ سے یہ دونوں روایات ضعیف ہیں ،

اِن دو ضعیف حدیثوں  کے بعد إمام البیہقی رحمہُ اللہ نے ایک مُرسل روایت بھی  ذِکر ہے ، کہ ،  ایک دفعہ رسول اللہ صلی اللہ علیہ وعلی آلہ وسلم نے دو عورتوں کو نماز پڑھتے ہوئے دیکھا تو  اُن دونوں سے اِرشاد فرمایا (((إِذَا سَجَدْتُمَا فَضُمَّا بَعْضَ اللَّحْمِ إِلَى الأَرْضِ ، فَإِنَّ الْمَرْأَةَ لَيْسَتْ فِى ذَلِكَ كَالرَّجُلِ ::: جب تم سجدہ کرو تو   اپنے جِسم کا کچھ حصہ زمین کے ساتھ لگا دِیا کرو، کیونکہ نماز پڑھنے کے معاملے میں عورت مرد کی طرح نہیں ہے )))سابقہ حوالہ ،

یہ روایت  یزید بن ابی حبیب کی مرسل  روایت ہے ، اور  مُرسل روایت بھی ضعیف یعنی کمزور، ناقابل حجت ہوتی ہے ، بالخصوص جب کہ اُسے کِسی صحیح روایت کی گواہی مُیسر نہ ہو ،

لہذا معاملہ بالکل صاف ہوا کہ عورت اور مرد کی نماز کی ادائیگی میں  ، نماز کے طریقے میں ، نماز کی کیفیت میں اللہ تعالیٰ اور رسول اللہ صلی اللہ علیہ وعلی آلہ وسلم کی طرف سے کوئی فرق نہیں رکھا گیا،

صِرف افضلیت کے باب میں سے کچھ بزرگوں کے اقوال ایسے ملتے ہیں جن سے یہ سبق ملتا ہے کہ عورت کو نماز پڑھتے ہوئے بھی اپنے آپ کو ڈھکا چھپا رکھنے کی کوشش کرنا ہی چاہیے ،

اور  شاید اِسی لیے   عورت کو سینے پر ہاتھ باندھنے کا حُکم فرمایا جاتا ہے جبکہ  عورت کا سینہ تو اللہ نے ابھرا ہوا رکھا ہے اب اگر وہ ہاتھ بھی سینے پر رکھتی ہے تو ڈھک چُھپ کر نماز پڑھانے کا  خیال نا دُرست  ہو جاتا ہے ، قطع نظر اِس کے کہ اِس فرق کی بھی قُران و سُنّت میں کوئی دلیل  نہیں ، اور نہ ہی مرد کے لیے ناف پر یا سینے کے عِلاوہ کہیں بھی اور ہاتھ باندھنے کی کوئی صحیح دلیل ہے ،

میرے مسلمان بھائی بہنو، اللہ تعالی کا فرمان ہے ((( یَا أَیُّہَا الَّذِینَ آمَنُوا لَا تَرفَعُوا أَصوَاتَکُم فَوق َ صَوتِ النَّبِیِّ وَلَا تَجہَرُوا لَہُ بِالقَولِ کَجَہرِ بَعضِکُم لِبَعضٍ أَن تَحبَطَ أَعمَالُکُم وَأَنتُم لَا تَشعُرُون::: اے ( لوگو) جو أیمان لائے ہو اپنی آوازوں کو نبی کی آواز سے بلند مت کرو اور نہ ہی اُس سے اونچی آواز میں بات کرو جیسے ایک دوسرے سے کرتے ہو ، کہیں ( ایسا نہ ہو کہ ) تمہارے أعمال ضائع ہو جائیں اور تمہیں پتہ بھی نہ ہو ))) سُورت الحجرات / دُوسری آیت ،

اللہ اور رسول اللہ صلی اللہ علیہ وسلم سے آگے بڑھنے کا مطلب ہے کہ اللہ اور رسول اللہ صلی اللہ علیہ وسلم کے فیصلوں اور حکموں کو ماننے اور اُن پر عمل کرنے کی بجائے اپنی یا کِسی اور کی رائے ، فتوے ، خیال یا بہانے بازی کرنا ہے ، اور اِسی طرح رسول اللہ صلی اللہ علیہ وسلم کی موت کے بعد اُن صلی اللہ علیہ وسلم کی آواز سے مراد اُنکے فرمان ہیں جو اب تک نقل ہو کر آ رہے ہیں گویا کہ ہم رسول اللہ صلی اللہ علیہ وسلم کی آواز سن رہے ہیں اور اُن صلی اللہ علیہ وسلم کی آواز سے آواز بلند کرنا اور اُن صلی اللہ علیہ وسلم کی پکار یا اُن صلی اللہ علیہ وسلم کی طرف سے بلائے جانے کو کِسی عام آدمی کی پکار سمجھ کر لاپرواہی کرنا ، اُن صلی اللہ علیہ وسلم کی بات کو چھوڑ کر کِسی بھی اور کی بات کو أپنانا حرام ہے ،اور اِسکا نتیجہ اللہ تعالیٰ کی طرف سے آفت یا عذاب کی صورت میں ظاہر ہوتا ہے ،

جیسا کہ اللہ تعالیٰ نے ہمیں بتایاہے ((( لَا تَجعَلُوا دُعَاء الرَّسُولِ بَینَکُم کَدُعَاء  بَعضِکُم بَعضاً قَد یَعلَمُ اللَّہُ الَّذِینَ یَتَسَلَّلُونَ مِنکُم لِوَاذاً فَلیَحذَرِ الَّذِینَ یُخَالِفُونَ عَن أَمرِہِ أَن تُصِیبَہُم فِتنَۃٌ أَو یُصِیبَہُم عَذَابٌ أَلِیمٌ  ::: تُم رسول (صلی اللہ علیہ وسلم ) کے بلانے کو ایسا بلانا مت بناؤ جیسا کہ تُم لوگوں کا ایک دوسرے کو بلانا ہوتا ہے ، تُم میں سے اللہ اُنہیں خوب جانتا ہے جو ( رسول صلی اللہ علیہ وسلم کی طرف سے بلاوے پر ) نظر بچا کر چُپکے سے کِھسک جاتے ہیں لہذا جو لوگ اُس (اللہ صلی اللہ علیہ وسلم ) کے حکم کی مخالفت کرتے ہیں وہ خبردار رہیں کہ ( کہیں ) اُن پر کوئی آفت نہ آ پڑے یا ( کہیں ) اُنہیں کوئی عذاب نہ آ پکڑے )))سُورت النور /آیت 63،

اللہ کرے کہ ہم لوگ  تبلیغِ دِین سے پہلے عِلمِ دِین کا کچھ بُنیادی حصہ تو حاصل کر لیں ، کم از کم اتنا جان لیں کہ جو بات ہم کہہ یا لکھ رہے ہیں وہ اللہ او ررسول اللہ صلی اللہ علیہ وسلم کی طرف سے کِسی دلیل پر مبنی ہے کہ نہیں ،، کم از کم دلیل تو جان لی جائے اُس کو دُرُست طور پر اِستعمال کِیا جا رہا ہے یا نہیں یہ جاننا دوسرا مرحلہ ہے ، لیکن جب دلیل تک جاننے کی زحمت نہ جائے تو پھر جِس کا جیسے جی چاہے اور جہاں جی چاہے ہمیں لیے چلتا ہے ۔ اللہ تعالیٰ ہر کلمہ گو کو دِین اِسلام جاننے سیکھنے اور پہچاننے کی توفیق عطا فرمائے اور اِسلامی مذاھب میں سے دُرست اور غیر دُرُست کی پہچان عطاء فرمائے ۔

السلام علیکم و رحمۃُ اللہ و برکاتہُ ، طلبگارِ دُعا ، عادِل سُہیل ظفر۔

 ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔